1 November 2026 (Bahasa Nias)

TATA IBADAH BAHASA NIAS

1 NOVEMBER 2026

[Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi]

FANGOWAI BA FOGAONI

Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu!

Jemaat : Ya'ahowu!

Liturgos : Yafao-fao khömi Lowalangi!

Jemaat : Ya fao khöu Geheha-Nia!

Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö Numero 1

2. Ya’ahowu dozi niha, samati khö Yehowa.
   Sanötöna fangorifi, ba döi Yesu So’aya.
   Saro tödö ba da’ö, fa’auri dötönafö.
3. Yehowa zamokai hörö, ba samè khöda haga.
   Ibönökhi göi wame’e, fefu zoguna khöda.
   Lö manö faröi Ia, ba nifabu’u-Nia.
4. Salawa yawa Zalawa, Lowalangi Yehowa.
   Andrö ta’o’ö li-Nia, lö manö baero-Nia.
   No so Ia ba khöda, Haleluya khö-Nia.

FANGA’ARO’Ö WA’OWULO (VOTUM)

Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yawa awö danö!

Jemaat : Yaduhu!

Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehomBO. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA!

Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato

Liturgos : Manunö ita moroi ba Mbuku Zinunö Nomero 217

2. No aboto ba dödögu, ha Yesu khögu gubalo sindruhu.
   Lö manö sa ufonaha, ngawalö horö famabaligu khö-U.
3. Fefu gisö’isö dödö, u’andrö böi ifatörö dödögu.
   Bè Geheha sohagaini, sangabölö, samohouni tödögu.
4. Na ambö fa’aro dödö, lö falukhado wa’omuso dödö.
   He Yesu, u’andrö tolo, folakhömi ba dödögu röfa-Mö.
5. Utötöna, lö Ötimba, ero möido mangalulu föna-Mö.
   Me omasido utema wangefa, fangorifi, fangatulö.
6. Bè khögu wanaha tödö, ba wanandraigö si ero ma’ökhö.
   Folakhömi ba dödögu, wa’omasi si lö mamalömalö.
7. Fehulu sibai dödögu, ba wogamö fa’auri silö aetu.
   Lö ae mangiwa dödögu, me Ya’ugö zawatögu Yaduhu.

FOMBASO TAROMALI LOWALANGI (AMABU'ULA LI SIFÖFÖNA)

Liturgos : Da tafondrondrongo daroma Li Lowalangi, tehalö moroi ba zura II Moze 20 : 1-17

1 Ba iwa’ö daroma li andrö fefu Yehowa, imane:
2 Ya’odo Yehowa Lowalangiu, si no mangeheta ya’ugö ba danö Miserayi andrö, ba zi no möi sawuyu ami.
3 Böi so khömö Lowalangi tánö bö’ö, baero ndra’o.
4 Böi fazökhi khöu nadu, ba he famaedo hadia ia, he si so si yawa ba mbanua, ba he si so si tou ba guli danö, ba he si so ba nidanö, barö danö.
5 Böi angalulu khönia ba böi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horö ndra ama ba ndraono ba ba ma’uwu mitou, khöra si fatiu tödö khögu,
6 ba si hakhösi tödö sangomasi’ö ya’o ba solo’ö oroisagu; irugi hönö nga’ötö.
7 Böi tötöi döi Lowalangiu Yehowa ba waya; lö’ö sa zi lö ihuku Yehowa zanötöi töinia ba waya.
8 Ame’egö tödö luo wolombase andrö, ba we’amoni’ö ya’ia.
9 önö ngaluo mohalöwö ndra’ugö ba öhalö halöwöu fefu.
10 Ba ero fitu bongi, ba luo wolombase khö Lowalangiu Yehowa; böi babaya hadia ia halöwö ba da’ö, he ya’ugö, ba he onou matua, ba he onou alawe, ba he sangai halöwö khöu ira matua ba he sangai halöwö khöu ira alawe, ba he uriföu, ba he si fatewu khöu ba mbanuami bakha.
11 önö ngaluo sa mege khö Yehowa, ba wamazökhi banua si yawa, awö danö, awö nasi, awö nösira fefu; ba ba luo si fitu, ba no molombase ia. Andrö wa no ifahawu’ö luo si fitu andrö Yehowa, ba no i’amoni’ö.
12 Fosumange namau, awö ninau, ena’ö anau nosou ba danö, nibe’e Lowalangiu Yehowa khöu.
13 Böi ange’e.
14 Böi ohorö.
15 Böi anagö.
16 Böi böbögö khö nawöu zi lö duhu.
17 Böi isö nomo nawöu. Böi isö wo’omo nawöu ba he sangai halöwö khönia ira matua, ba he sangai halöwö khönia ira alawe, ba he öröbaonia, ba he kudonia, ba he hadia ia, fefu, nibayabaya nawöu.

Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1

FANGANDRÖ FANGEFA HORÖ

Liturgos : Ya’ami ira talifusö, Na tawa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato.

Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö."

Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen)

Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! "NA UBINI’Ö HORÖGU KHÖ YESU"

Jemaat : Manunö moroi ba Mbuku Zinunö No. 224 : 1

Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa!

Jemaat : Manunö moroi ba Mbuku Zinunö No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)

Liturgos : Da tafondrondrongo daroma Li Lowalangi, tehalö moroi ba zura Mareko 3 : 31-35

31 Ba so ninania ba ira talifusönia, no so baewali ba lafatenge khönia, lafahede’ö khönia.
32 Ba no lafasui ia wedadao niha sato. Ba lamane khönia: Hiza, no so baero ninau ba ira talifusöu matua ba ira talifusöu alawe, la’alui ndra’ugö.
33 Ba itema lira, imane: Ha niha ninagu, ba ha niha dalifusögu?
34 Ba ifakhölö ia, ifaigi zi tefasui ya’ia si dadao, ba imane: Hiza ninagu ba talifusögu.
35 Solo’ö somasi Lowalangi, da’ö dalifusögu matua ba talifusögu alawe ba inagu.

Ya’ahowu zamondrongo taroma Li Lowalangi ba same’e ba dödö (Luka 11:28)

Jemaat : Yaduhu!

FANGOWULOI FASÖMBATA

Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7)

Tafa’ema föna wasömbata khö Lowalangi, ba manunö ita moroi ba Mbuku Zinunö No. 261

2. Ya’e zumange fasömbata ma be’e soroi ba dödöma.
3. Ya’e zumange fasömbata buala si’otarai Nama.
4. Ya’e zumange fasömbata, boto, noso, ba fa’aurima.
5. Ya’e zumange fasömbata, lö irugi zomasi dödö-U.
6. Ya’e zumange fasömbata, ma’aohasi gölö Zo’aya.

Liturgos : Da tafasao wasömbatada andre föna Lowalangi, musindro ita fefu.

[Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]

Liturgos : Mudadao Zato!

KOOR / VOCAL GROUP

Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163

[Pengkhotbah Möi ba Mimbar]

HUHUO SEBUA

Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita... [Fangadrö Famokai Huhuo Sebua] Amin.

1. Fombaso Taroma Li Lowalangi moroi ba zura I Tesalonika 2 : 8-12
   8 Si manö wehulu dödöma khömi, ba no aoha gölöma, tenga ha turia somuso dödö andrö khö Lowalangi mafa’ema khömi, nosoma göi, ba no khömi, me no omasiga ami.
   9 Dörö itörö tödömi, ya’ami, ira talifusö, wa’erege dödöma ba famakaoma andrö; bongi ma’?khö mohalöhalöwö ndra’aga, ena’ö samösa lö’ö, ba khömi, sabu tödö ba khöma andre, me maturiagö khömi duria somuso dödö andrö, khö Lowalangi.
   10 No anehe ami ba no anehe Lowalangi wa’ohauhauma ba fa’atulö dödöma andrö, awö wa no lö sinegu khöma, ba khömi samati andrö.
   11 Mi’ila he wisa wango’ouma ya’ami, dozi ami, ba he wisa wamarouma tödömi, hulö nama khö nononia,
   12 ba he wisa wamaduhu’öma khömi, ena’ö mihaogö mbuabuami, ena’ö si nangea khö Lowalangi andrö, sogaoni ya’ami banuania, ba ba lakhömi andrö khönia.
2. Famotokhi Taromali Lowalangi
3. Sinanö ba dödö tehalö moroi ba zura I Tesalonika 2 : 12b
   Ena’ö mihaogö mbuabuami, ena’ö si nangea khö Lowalangi andrö, sogaoni ya’ami banuania, ba ba lakhömi andrö khönia.
4. Fangandrö Fondruhö Wamotokhi Taromali

Jemaat : Manunö moroi ba Mbuku Zinunö No. 154

TUHO WAMATI

Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida:

• Ya’o mamati khö Lowalangi Ama si lö ambö fa’abölö, somböi banua si ya?a awö danö.
• Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
• Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu!

Liturgos : Mudadao Zato.

WARTA JEMAAT (Klik untuk membuka)

Liturgos : Manunö ita moroi ba Mbuku Zinunö Numero 470

2. Yesu sauri, zamaeri fa’aurigu. 3x
   Andrö lö te’alado, lö elungu.

FANGANDRÖ SALAHI + FAMATENGE + HOWUHOWU

Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:"

Pengkhotbah + Jemaat :

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu.

Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi:

• Ya mufahowu’ö ami Lowalangi, Ya murorogö ami;
• Ya mufohaga mbawa-Nia khömi, Ya mu’ebua’ö dödö-Nia khömi;
• Ya mufalemba hörö-Nia khömi, Ya mubč’e wa’ohahau dödö khömi fefu. Yaduhu!

Jemaat : Manunö moroi ba Mbuku Zinunö Numero 470 : 3-4

3. Yesu sauri, gubalogu sindruhu. 3x
   Lö sambö ndra’o, lö göi fa’ata’u.
4. Yesu sauri, dötönafö sindruhu. 3x
   Ba wogamö fa’auri si lö aetu.

Pengkhotbah : Ya'ahowu!!!

Jemaat : Ya'ahowu!!!

*** IBADAH SELESAI ***