30 Agustus 2026 (Bahasa Nias)

30 Agustus 2026 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 2 Suno Zo’aya me Ibè mbuala, me Idozigö wame’e si sökhi. Ba no fahöna Ibè ba zamati, suno Zo’aya. Suno Zo’aya Irorogö ita, I’ohe ita ba lala satulö. Dozi niha sedöna ae molo’ö, suno Zo’aya. Suno Zo’aya me lö aefa’aefa, oi Ihörögö zamati khö-Nia. Afu khö-Nia manötöna ira, suno Zo’aya. Suno Zo’aya me kubalo Ia, Ifolombase, Ibe’e zabönö. Ifasao ita ba zahono dödö, suno Zo’aya. Suno Zo’aya sanimba te’ala, si no elungu, I’ohe ba lala. Ibe’e wotu ba famangelama, suno Zo’aya. Suno Zo’aya solului khöda, na tebai ita ba wolawa horö. Itolo ita ba wasöndratada, suno Zo’aya. Suno Zo’aya me Ibe Geheha, sondrara tödö na tosasa ita. Oi Ifasao, Itolo göi ba lala, suno Zo’aya. Suno Zo’aya si lö faröi khöda, he no faröi khöda fefu nawöda. Lö sa faröi khöda Lowalangida, suno Zo’aya. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 272 Omasido, omasido, Yesu, si möi mangatulö. Ha khö-Nia so wangefa, me sahakhö tödö Ia, na so wangesa dödö. Da fao ita, da fao ita, tabu ta’ondrasi Yesu. Me Ya’ia khöda lala, fa’auri ba fa’aduhu irugi zi lö aetu. FOMBASO TAROMALI LOWALANGI (AMABU'ULA LI SIFÖFÖNA) Liturgos : Da tafondrondrongo daroma Li Lowalangi, tehalö moroi ba zura Sinunö 119 : 101-112 101 Lõ urai uhundragõ lala si lõ sõkhi, ena’õ u’o’õ limõ andrõ. 102 Lõ ubõhõli zatulõ andrõ khõu; me no õfahaõ ndra’odo. 103 Wa’ami ba lelagu gamabu’ula limõ andrõ; ami moroi ba we wani ba mbawagu! 104 Fangatuatuagu goroisamõ andrõ; andrõ u’ogorofi fefu lala waya andrõ. 105 Fandru fõna gahegu daroma limõ andrõ, ba haga ba lalagu. 106 No fahõlu ndra’odo, ba u’o’õ, ba wanõngõni amakhoitamõ andrõ, si no atulõ. 107 No aõndrõ sibai ndra’odo. He Yehowa orifi ndra’o, fatõrõ ba limõ andrõ? 108 Ena’õ na omasi ndra’ugõ game’ela mbewegu andrõ, soroi ba dõdõ, ya’ugõ Yehowa, ba ena’õ na õfahaõ ndra’odo ba gamakhoitamõ andrõ. 109 Ugogohe tangagu nosogu, si lõ mamalõmalõ, ba lõ olifudo goroisamõ andrõ. 110 No lalau wesu khõgu sebua horõ andrõ, ba lõ selungu ndra’o, lõ nibõhõligu oroisamõ andrõ. 111 Tána khõgu, irugi zi lõ aetu, wamaduhu’õmõ andrõ, me no fa’omuso dõdõgu. 112 No aolo dõdõgu ba wolo’õ amakhoitamõ andrõ, si lõ mamalõmalõ, irugi gamozua. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRÖ FANGEFA HORÖ Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura II Timoteo 4 : 6-8 6 Ya’odo sa, ba nibe’e sumange sa’ae, ba lõ ara tõ, ba irugi baw~a wangefagu andrõ. 7 Fasõndrata si sõkhi andrõ, ba no ulau, ba tõrõw~a andrõ, ba no u’o’ozui, lõ nibõhõligu famati andrõ. 8 Ba iada’e sa’ae, ba no mufõfõ’õ khõgu dakula ba wa’atulõ dõdõ andrõ, nibe’e Zo’aya andrõ, sangatulõ’õ fanguhuku, khõgu dania, na luo safuria andrõ, ba tenga ha khõgu, idozigõ gõi zangomasi’õ fa’ato’elenia andrõ. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Yeremia 15 : 15-21 15 Õ’ila sa’ae, ya’ugõ Yehowa! Tõrõ tõdõu ndra’odo, tolodo ba lau mbalõgu ba zolohi ya’odo; bõi bunudo, ba wa’ebolo dõdõu andrõ [khõra]: tõrõ tõdõu, wa no bõrõ ndra’ugõ, wa ulu’i wa’aila! 16 Falukhado daroma li khõu, ba no amaedola gõgu, ba tobali fa’omuso dõdõgu daroma liu andrõ, ba fa’owuawua dõdõgu, no tõimõ mbõrõ wamotõi ya’odo, ya’ugõ Yehowa, Lowalangi ngahõnõ. 17 Lõ sorududo fedaodao ba zomuso tõdõ, fa ma’ikido ena’õ: ba dangau andrõ, ba no tonia ndra’o wedadao, me no fahõna wa lõ sõkhisõkhi dõdõgu õbe’e. 18 Hana wa lõ’õ sa’ae mamalõmalõ wa’afõkhõ andrõ khõgu, ba hana wa monananana zokhogu andrõ, fa tebai nifadõhõ? Hadia, amaedola mbombo si falimo ndra’ugõ khõgu, idanõ saetu’aetu? 19 Andrõ imane Yehowa: Na õfuli’õ, ba ufuli utehe khõu wangondrasi ya’odo, ba na õ’oniagõ ira zi nangea zi lõ sõkhi, ba amaedola mbawagu zui ndra’ugõ? Ya’ira zi otahagõ ya’ugõ, ba ya’ugõ, ba lõ õ’otahogõ ira. 20 Ba ube’e ba’aba’a tõla saró ndra’ugõ fõna niha andrõ, ba na fasõndra ira khõu, ba tebai lalawa ndra’ugõ, so sa’ae ndra’odo ba ngaiu, ba wanolo ya’ugõ ba ba wangorifi ya’ugõ — iwa’õ Yehowa. 21 Ba u’efa’õ ndra’ugõ ba danga zi lõ sõkhi ba ba gokhõ zamakao. Famotokhi Taromali Lowalangi Sinanö ba dödö tehalö moroi ba zura Yeremia 15 : 16b Ba tobali fa’omuso dõdõgu daroma liu andrõ, ba fa’owuawua dõdõgu. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 279 Oroma’ö lalama ba haga-Mö. Me asese tobini ba telumö. Lakhömi gulidanö zolumö’ö. Ba gisö’isö dödö soya manö. Ya’ugö gubaloma si lö faröi. Sanuturu lalama ba wekoli. He oya nemalima sangalani. Ö’ila ötenawa ba Öfoloi. FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 279 Aro’ö wamatima wanöngöni. Li-Mö si no Öwa’ö ba zamati. Wa dozi sanau ölö si lö faröi. Duhu wa oi latema wangorifi. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***