13 Agustus 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 13 Agustus 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 2 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 202 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Hezekieli 34 : 23 - 31 23 Ba ufataro gubalo khõra, si ha samõsa, da’õ dania zokubaloi ya’ira, enonigu Dawido andrõ. Da’õ zokubaloi ya’ira, da’õ gubalora. 24 Ba ya’odo Yehowa, ba Lowalangira, ba enonigu Dawido andrõ, ba salawa ba khõra; no ya’odo, Yehowa, zanguma’õ! 25 Ba fawu’u li ndra’o khõra, fawu’usa li ba wa’atulõ, utu ndru’u safaito fefu, ba utaboi, uheta ba danõ, ba tobali tola la’iagõ danõ si mate, lõ hadia ia, ba tola mõrõ ba dalu gatua. 26 Ba ya’ira ba hadia zi tefasui hilihili andrõ khõgu, ba ubali’õ howuhowu, ba ube’e aekhu ba danõ deu na inõtõ; teu howuhowu deu andrõ! 27 Ba mowua geu ba kabu, ba tanõ, ba mowua, ba la’iagõ danõra lõ hadia ia, ba aboto ba dõdõra, wa no ya’odo Yehowa, na ufatõ dõla galo mbagi andrõ khõra, ba na u’efa’õ ira ba danga zangosawuyu ya’ira mege. 28 Ba bõi sa’ae ahulua niha baero ira ba bõi sa’ae mõi õ gutu ndru’u ba danõ; sahono ira, lõ hadia ia, ba nahiara, lõ si keani ya’ira. 29 Ba si no maulu zinanõra ube’e, ba samõsa lõ’õ sa’ae ba danõ si mate olofo, ba alakha lõ’õ sa’ae lataõgõ wango’aya niha baero. 30 Ba ya aboto ba dõdõra, wa utolo ira, ya’odo andre, Yehowa, Lowalangira, awõ wa no banuagu ira, ya’ira, ma’uwu Gizeraëli, iwa’õ So’aya, Yehowa. 31 Ba ya’ami, ba no biribirigu ami, biribiri nikubaloigu [niha] ami; ya’odo Lowalangimi! iwa’õ So’aya, Yehowa. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 8 : 5 - 13 5 Ba me mõi ia miyomo ba Gafanauma ba i’ondrasi ia kumandra, mangandrõ khõnia, imane: 6 He Tua, so yomo zawuyugu, tou ba zalo manõ, no mate dambai, a’oi so wa’afõkhõ. 7 Imane khõnia: Mõido mufadõhõ wõkhõnia. 8 Ba itema linia kumandra andrõ, imane: He Tua, ambõ ndra’o mõi’õ ba nomogu, ba hede manõ, ha sambua li, ba dõhõ wõkhõ zawuyugu. 9 Ya’odo sa gõi, ba no niha si so barõ mbawa zalawa, ba so barõ mbawagu zaradadu, ba na uwa’õ ba zi samõsa: Ae’e, ba mofanõ ia, ba ba zi samõsa: Aine, ba so ia; ba na uwa’õ khõ zawuyugu: Halõwou da’õ, ba ihalõ. 10 Ba me irongo da’õ Yesu, ba ahõlihõli dõdõnia, ba imane ba zolo’õ ya’ia: Si ndruhu niwa’õgu khõmi, ba Ndraono Gizeraëli na i, ba lõ nisõndragu famati si manõ. 11 Ba uwa’õ khõmi, ato dania zi otarai danõ ba gatumbukha, awõ zi otarai danõ ba gaekhula ba manga ira, awõ ndra Aberahamo, Iza’aki, Yakobo ba mbanua zorugo andrõ, 12 ba nitibo’õ baero nono mbanua andrõ ba zogõmigõmi, baero sibai, ba fege’ege dania ba da’õ, ba fatangisa mboha. 13 Ba imane Yesu khõ gumandra andrõ: Fuli’õ, ya’itõrõ zi faduhu dõdõu. Ba ba da’õ sibai dõhõ wõkhõ zawuyu no mege. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura I Moze 39 : 1 - 5 1 Ba me no la’ohe ba danõ Miserayi Yosefo, ba i’õli ia Fotifa, Dawa Miserayi, mandru yomo khõ Wara’o, hõgõ wazuri, ihõli ba Ndraono Zima’eli andrõ, solohe ya’ia misi tou ba da’õ. 2 Ba itolo Yosefo Yehowa, tobali mofozu fefu hadia ia khõnia, ba ba nomo Ndrawa Miserayi andrõ, sokhõ ya’ia sosó ia. 3 Ba me i’ila sokhõ ya’ia, itolo ia Yehowa, awõ wa mofozu fefu hadia ia halõwõnia, ibe’e Yehowa, 4 ba ebua sibai dõdõnia khõ Yosefo, ba ihalõ ia ngoningoninia ba ifataro ia mandru yomo khõnia, ba ibe’e ba dangania fefu hadia ia nibayabayania. 5 Ba i’otarai da’õ, me no ifataro ia mandru yomo khõnia ba samaigimaigi nibayabayania fefu, ba ifahowu’õ Yehowa nomo Ndrawa Miserayi andrõ, bõrõ Yosefo, ba howuhowu Yehowa manõ ba zi so khõnia, fefu, he yomo, ba he baero. Famotokhi Taromali Lowalangi Sinanõ ba dõdõ tehalõ moroi ba zura Hezekieli 34 : 26a Ba ya’ira ba hadia zi tefasui hilihili andrӧ khӧ-Gu, ba Ubali’ӧ howuhowu. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 145 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 262 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***