Khusus

FANGOWAI BA FOGAONI
FANGOWAI
Liturgos : Ya’ami banua Zo’aya ni’omasi’õ ba dõi Yesu Keriso, no tarugi migu nifotõi migu fõna wamakao Yesu. Tõi migu ma’õkhõ andre, ya’ia da’õ: Estomihi, eluahania "Ena’õ naha saro Ndra’ugõ, nahiagu sawatõgu". Ngaluo si 50, Fõna wemaoso Yesu. Ma’owai ami, ba dõi Zo’aya ya’ita Yesu Keriso Ya’ahowu!

Jemaat : Ya'ahowu!

Liturgos : Yafao-fao khõmi Lowalangi!

Jemaat : Ya fao khõu Geheha-Nia!

FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ Numero 5 ayati 1 irugi 2 "SUNO YEHOWA"

FANGA’ARO’Õ WA’OWULO (VOTUM)(Dibawakan oleh Pendeta)
Pendeta : Da tahonogõ dõdõda ba wariawõsa, ba ba wa ha sambua khõ Lowalangi... musindro ita fefu!

No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!

Jemaat : Yaduhu!

Liturgos : Fõkhõda nilu’i-Nia ba no Ihare’õ khõ-Nia zafõkhõ khõda; ba ba dõdõda, ba ni’otu’õ Ia, nibõzibõzi Lowalangi ba nifakao. Ba no lalõda sa mbõrõ wa tefesokho Ia, ba horõda mbõrõ wa terasa Ia. Ya’ia zolu’i huku ena’õ sohahau tõdõ ita, ba moroi ba zokho-Nia wa no dõhõ wõkhõda. HALELUYA!

Liturgos : Mangandrõ ita, "He Yehowa Lowalangi Ama sahakhõ tõdõ ba sebua fa’omasi si no umbu howuhowu ba fa’auri. Itõrõ tõdõma wamakao Zo’aya ya’aga Yesu Keriso. No Õlulu nono-U omasiõ ba danga zokhõ horõ: te’o’aya, tefakao, teforõfa ba mate bõrõ horõma. Fahaõ ndra’aga, fa’aboto ba dõdõma ngawalõ horõ si no mafalua. Abõlõ’õ ndra’aga wolawa fa’abõlõ nõsi, ena’õ mo’ahonoa ndra’aga ba wamalua somasi Nama, ba khõ Zo’aya ya’aga Yesu Keriso ba ba Geheha Ni’amoni’õ, Yaduhu!" Mudadao Zato!

Liturgos : Manunõ ita moroi ba Mbuku Zinunõ Numero 225 ayati 1 irugi 2 "HE YA'ITA ZAMÕSANA"

FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura Sinunõ faza 99 ayati 1 irugi 9

1. Razo Yehowa; sanizinizi niha baero; yawa Kerubi dumadao ia, humisi danõ.
   
2. Ebua Yehowa, ba Ziona, yawa niha bõ’õ fefu ia.
   
3. Ya lasuno dõimõ andrõ, sebua, sata’u niha; ni’amoni’õ ia.
   
4. Awõ wa’abõlõ razo andrõ, somasi huku satulõ; nifatõrõu ba ma’uwu Yakobo andrõ, ba sadõlõ ba satulõ.
   
5. Mifosumange Yehowa, Lowalangida, mi’angalulu fõna mbakubaku gahe andrõ khõnia: ni’amoni’õ ia!
   
6. Awõ gere andrõ khõnia ndra Moze A’aroni, ba awõ zi angarõfi li ya’ia Zamuëli andrõ; mangandrõ ira khõ Yehowa, ba ifondrondrongo lira.
   
7. Ba lawuo andrõ fahuhuo ia khõra; la’o’õ wamaduhu’õ andrõ khõnia ba amakhoita andrõ, nifakhoinia khõra.
   
8. He Yehowa, Lowalangima, no õfondrondrongo lira. Lowalangi sebolo tõdõ ndra’ugõ khõra ba solau balõ ba zi lõ sõkhi andrõ, nifazõkhira.
   
9. Mifosumange Yehowa, Lowalangida andrõ, mi’angalulu ba gahe hili andrõ khõnia, ni’amoni’õ. Ni’amoni’õ sa Yehowa, Lowalangida andrõ!

Si manõ daroma Li Lowalangi, da tatema’õ faoma sinunõ TASUNOSUNO YEHOWA

FANGANDRÕ FANGEFA HORÕ
Liturgos : Ya’ami ira talifusõ... Na tawa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ. Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda...Musindro ita fefu!
Mangandrõ ita, "He Ama, Lowalangima sebua fa’omasi. Masuno ba ma’angarõfili Ndra’ugõ Yehowa. Mõiga ma’ondrasi Ndra’ugõ ba nahia ni’amoni’õ, ya’aga niha si no ra’iõ. Mafaduhu’õ wa tenga si nangea ndra’aga tanõ fõna-Mõ, me no fahõna horõ si no mafalua, he ba wehedema, era’era dõdõma, awõ gamuatama si lõ faudu ba daroma Li-Mõ. No ambõ ndra’aga ba wangomasi’õ Ya’ugõ soroi dõdõ. Asese olifu ndra’aga wangandrõ saohagõlõ ba howuhowu-Mõ si no matema, ba no arõrõ ndra’aga ba gisõ’isõ dõdõ ba guli danõ andre. Si tekiko ndra’aga ba horõma. Andrõ ha fa’ahakhõ dõdõ Nama ni’andrõma. Bologõ dõdõ-U khõma ba be’e aefa khõma horõma..."

Jemaat : Manunõ ita NA UBINI'Õ HORÕGU KHÕ YESU

Liturgos : Ba no erege dõdõ-Gu õbe’e ba horõu andrõ; no õfakao-Do olalõwamõ. Ya’o, Ya’odo andre zamunu lalõu andrõ. Bõrõ Ndra’o, ba lõ’õ sa’ae itõrõ tõdõ-Gu horõu! Lakhõmi khõ Lowalangi si yawa!

Jemaat : Manunõ moroi ba Mbuku Zinunõ No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura Yohane faza 17 ayati 1 irugi 5

1. Da’õ niwa’õ Yesu, ba ifaõga hõrõnia miyawa ba zorugo, ba imane: He Ama, no irugi inõtõ; folakhõmi Nonou, ena’õ ifolakhõmi ndra’ugõ Ono.
2. Si mane fame’eu barõ mbawania fefu niha, ena’õ idozigõ fa’auri si lõ aetu nibe’eu khõnia andrõ.
3. Da’õ wa’auri si lõ aetu, ena’õ aboto ba dõdõra ndra’ugõ, Lowalangi si ndruhu andrõ, si ha sambua, ba ena’õ aboto ba dõdõra zinengeu andrõ, Yesu Keriso.
4. No ufolakhõmi ndra’ugõ ba guli danõ, no u’asiwaligõ halõwõ andrõ, nibe’eu khõgu ba wangai ya’ia.
5. Ba iada’e, ba folakhõmi ndra’o, awõu ya’ugõ, Ama, lakhõmi si no so khõgu ba khõu, fõna wa’aso danõ’a andrõ.

Ya’ahowu zamondrongo taroma Li Lowalangi ba same’e ba dõdõ...

Jemaat : Yaduhu!

FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu ba untuk Tanggungan ke Resort dan Sinodal. Ba si fõfõna ua da tafondrondrongo Li Lowalangi me imane, "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ Numero 261 "YA'E ZUMANGE"

2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.

Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]

Liturgos : Mudadao Zato!

KOOR/VOCAL GROUP (Kalau Ada)

Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ Numero 163 "UHONOGÕ SIBAI DÕDÕGU"

[Pengkhotbah Mõi ba Mimbar]

HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.

1. Fombaso Taroma Li Lowalangi moroi ba zura II Fetero 1 : 16-21

16 Tenga sa fayafaya, nifakhai dõdõ, dali khõma mege, me ma’ombakha’õ khõmi wa’abõlõ Zo’aya ya’ita, Yesu Keriso, ba fa’ato’elenia; noa sa si no anehenehe fa’asalawania ndra’aga;
17 noa sa itema khõ Lowalangi Ama zumange ba lakhõmi, me tetandrõsaigõ khõnia li andrõ, moroi ba lakhõmi andrõ, si no ebua sibai, me imane: ”Onogu omasiõ da’õ, wa’omasigu ia.”
18 Ba li andrõ, ba no marongo, moroi ba mbanua si yawa, me soga khõnia, ba hili ni’amoni’õ andrõ,
19 ba no sambua na wa’aro li zama’ele’õ andrõ, khõda, ba si sõkhinia, na mitõngõni ia, hulõ wandru, sohagaini naha si no ogõmigõmi, irege tobaha fa’amoluo, ba irege no tumbu madala andrõ ba dõdõmi.
20 Na si a’a zaboto ba dõdõmi, wa tenga lualua gera’era niha fefu, hadia ia, wama’ele’õ andrõ, ba zura.
21 Lõ’õ sa irai tumbu hadia ia wama’ele’õ ba wa’edõna niha, nifatõrõ Geheha ni’amoni’õ niha, na humede ira; ba Lowalangi moroi.

2. Famotokhi Taromali Lowalangi
3. Sinanõ ba dõdõ tehalõ moroi ba zura Yohane 13 : 32a

Na no tefolakhõmi Lowalangi ba khõnia, ba ifolakhõmi gõi ia Lowalangi, ba khõnia

4. Fangandrõ Fondruhõ Wamotokhi Taromali

Jemaat : Manunõ moroi ba Mbuku Zinunõ No. 154

TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, musindro ita fefu... Endronga lida:

• Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
• Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
• Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!

Liturgos : Mudadao Zato.

Liturgos : Iada'e da tafondrondrongo Gangombakhata Gereja, tebe'e ginõtõ

WARTA JEMAAT (Klik untuk membuka)

Liturgos : Manunõ ita moroi ba Mbuku Zinunõ Numero 151 ayati 1 irugi 2 "FONDRONDRONGO LI ZO'AYA, IKAONI ITA"

FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"

Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.

Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:

• Ya mufahowu’õ ami Lowalangi, Ya murorogõ ami;
• Ya mufohaga mbawa-Nia khõmi, Ya mu’ebua’õ dõdõ-Nia khõmi;
• Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!

Jemaat : Manunõ moroi ba Mbuku Zinunõ No. 17

Pengkhotbah : Ya'ahowu!!!

Jemaat : Ya'ahowu!!!

*** IBADAH SELESAI ***