26 Maret 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 26 Maret 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso ni’omasi’ö Zo’aya ya’ita Yesu Keriso. No tarugi migu Wanõrõ tõdõ Famakao Yesu ma’õkhõ, ma’owai ami: Ya’ahowu ami fefu, ya faofao khömi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta honogö dödöda wangondrasi Yehowa, da ta’erönusi tödöda wamakao si no itaögö So’aya ya’ita Yesu Keriso, manunõ ita moroi ba Mbuku Zinunõ No. 15 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Faigi khõgu zatulõ, Ya’ugõ Lowalangi, ohe ba lala huhuogu ba niha andrõ, si lõ fa’omasi; efa’õ ndra’o ba niha sebua faya, solau si lõ atulõ! Fa ukhamõ naha wame’e sumange khõ Lowalangi ba Lowalangi fa’omuso dõdõgu andrõ. Fa’ohe’õ haga-Mõ ba si duhu andrõ khõ-U! Da’õ zamasao ya’odo, solohe ya’o ba hili ni’amoni’õ andrõ khõ-U, ba ba naha-Mõ andrõ. (Sinunö 43:1,4a,3) HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi, si no umbu howuhowu ba fa’auri. Itörö tödöma wamakao Zo’aya ya’aga Yesu Keriso, No Ölulu nono-U omasiö ba danga zokhö horö: te’o’aya, tefakao, teforöfa ba mate börö horöma. Fahaö ndra’aga, fa’aboto ba dödöma ngawalö horö si no mafalua. Abölö’ö ndra’aga wolawa fa’abölö nösi, ena’ö mo’ahonoa ndra’aga ba wamalua somasi Nama, ba khö Zo’aya ya’aga Yesu Keriso ba ba Geheha Ni’amoni’ö, Yaduhu!" Mudadao Zato Liturgos : Manunõ ita moroi ba Mbuku Zinunõ No. 239 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura III Moze 19 : 33-37 19 Nifakhoigu, ba mitõngõni: lõ tola õʼorudugõ zi dua balõ urifõu, ba wamoʼono, ba lõ tola õfakhõyõ zi dua balõ sinanõ ba nowiu, ba lõ tola õʼobaru mbaru, si dua balõ bana mege ba wanoso yaʼia. 20 Na so zorudu ba ndra alawe, si no sawuyu niha bõʼõ, si lõ muhõli, si lõ muʼefaʼõ, ba nikhau ira; ba tenga sa nibunu, me no tenga niʼefaʼõ ia. 21 Ba iʼohe khõ Yehowa, ba zinga mbawandruhõ nose wamaʼeleʼõ, ogautania mbiribiri si matua, sumange fameta horõ. 22 Ba ifaigi khõnia wameta sala khõ Yehowa ere ba mbiribiri andrõ, sumange fameta horõ, ba horõ andrõ, nifazõkhinia; ba tebeʼe aefa khõnia horõ andrõ, nifazõkhinia. 23 Na mirugi dania danõ, ba na mitanõ ngawalõ geu sowua, ba bõi miteu gamaedola ”guli” andrõ — si aʼa mbua —. Medõlu fakhe waʼara, ba si lõ muboto miw̃aʼõ, ba lõ tola teʼā mbua. 24 Ba ba ndrõfi fanete zi medõlu fakhe, ba niʼamoniʼõ mbuania fefu, fangandrõ saoha gõlõ. 25 Ba ba ndrõfi fanete zi mendrõfa, ba tola miʼā mbua, enaʼõ tedou mbuania khõmi; Yehowa ndraʼodo, Lowalangimi. 26 Bõi miʼā hadia ia fabaya do. Bõi faeta ami ba bõi fakelemu. 27 Bõi miʼogaolo wanõwõ bumi, ba bõi mifaloʼo gambimi. 28 Bõi mikhoi nõsimi, na so zi mate, ba bõi misua gulimi; Yehowa ndraʼodo. 29 Bõi beʼe ba zalakha nonou alawe, wamarou yaʼia ba wohorõ, enaʼõ bõi mohorõ danõ ba enaʼõ bõi anõnõ horõ. 30 Luo wolombase andrõ khõgu, ba mitõngõni, ba miʼataʼufi niʼamoniʼõ andrõ khõgu; Yehowa ndraʼodo. 31 Bõi miʼae ba zogawi bekhu ba ba zi faeta; bõi misofu khõra hadia ia, fa bõi raʼiõ ami ba khõra mibeʼe; Yehowa ndraʼodo, Lowalangimi. 32 Na so zi no tohare huwa, ba maoso ndraʼugõ ba õfosumange zatua ba õʼataʼufi Lowalangimõ; Yehowa ndraʼodo. 33 Ba na so zi fatewu khõu, ba danõmi, ba bõi mifakao ia. 34 Ya si mane awõmi niha ba danõ niha bõʼõ andrõ, si so ba khõmi, miw̃aʼõ, õʼomasiʼõ ia, si mane fangomasiʼõmõ yaʼugõ, noa sa si fatewu gõi ami ba danõ Miserayi no; Yehowa ndraʼodo Lowalangimi. 35 Bõi mifuyuʼõ huku, na tefatunõ huhuo, ba bõi falimo ba helo, ba ma ba zaga, ba ma ba lauru. 36 Faliëra satulõ ba saga satulõ ba lauru satulõ ba tumba satulõ mifake; Yehowa ndraʼodo, Lowalangimi, si no mangeheta yaʼami ba danõ Miserayi. 37 Mitõngõni saʼae nifakhoigu andrõ, fefu, awõ huku andrõ khõgu, fefu, ba miʼoʼõ; Yehowa ndraʼodo. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Si manõ sa wa’omasi Lowalangi nõsi gulidanõ, no Ibe’e Nono-Nia andrõ, si ha sambua, ena’õ lõ tekiko dozi samati khõ-Nia, ena’õ so khõra wa’auri si lõ aetu (Yohane 3:16) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Halöwö Zinenge 6 : 1-7 1 Ba me luo da’õ, me tobali ato nifahaõ, ba tesao wekõkõkõkõ Ndrawa Heleni ba niha Heberaio, me te’ositengagõ lakha mbanua khõra, ba dolotolo andrõ, sero ma’õkhõ. 2 Ba lafalukha’õ nifahaõ sato si felendrua, lamane: Lõ omasiga, marõi daroma li Lowalangi, ba we’amõi ngoningoni ba wemanga. 3 Ba mifaigi niha, ba khõmi, ya’ami, ira talifusõ, dafitu, si sõkhi turia, si no fahõna Eheha ba fa’atutua, nifataroda ba halõwõ andrõ. 4 Ba lõ tebulõ ndra’aga ba wangandrõ ba ba halõwõ fangombakha taroma li. 5 Ba omasi zato fefu niwa’õ andrõ, ba latutuyu Zitefano andrõ, niha si no fahõna famati ba Eheha ni’amoni’õ, ba Filifo ba Ferokhoro ba Nikanoro ba Timo ba Faremena ba Nikola’o, si no mõi banuara, banua Gandriokhia, 6 la’ohe ira ba zinenge, ba mangandrõ da’õ ba latufa hõgõra tanga. 7 Ba monõnõnõnõ li Lowalangi, ba tobali ato sibai nifahaõ ba Yeruzalema, ato gõi gere, si faduhu tõdõ, solõ’õ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Hezekieli 45 : 9-17 9 Da’õ niwa’õ Zo’aya, Yehowa: Mibato sa’ae, ya’ami razo Ndraono Gizeraëli: Famakao ba famalangõgõ, ba mibõhõli, ba milau zadõlõ ba satulõ. Mibato wamakao banuagu andrõ! i’wa’õ So’aya, Yehowa. 10 Saga satulõ ba tumba satulõ ba lauru satulõ mifake. 11 Tumba ba lauru, ba ni’osara’õ; felelima lauru zi sa so’e labe’e ba walu hinaoya zi samba lauru. Ba zi sazo’e la’otarai wangerai. 12 Ba tõlu ngafulu saga zi samba fondruyu; na lima saga, ba lima saga gõi labe’e, ba na fulu saga, ba fulu saga, ba dua wulu rufia zi samba fondruyu. 13 Da’õ gamaedola wegero, nibe’emi: Sadumba ba zi sazo’e gandru ba sadumba gõi ba zi sazo’e ze’iri. 14 Ba nihonogõi ba wanikha, ba samba hinaoya ba zi sazo’e, ba zi felelima lauru, si sazo’e. 15 Ba sarasara nono mbiribiri ba zi 200 biribiri, amaedola fegero, nibe’e mado Ndraono Gizeraëli fefu, nibe’e sumange ni’a ba sumange nitunu ba sumange fangorifi, ba wameta salara, iwa’õ So’aya, Yehowa. 16 Niha sato fefu nifo’õmõ si hulõ wegero andrõ khõ razo Ndraono Gizeraëli. 17 Ba õmõ razo zumange nitunu ba sumange ni’a ba sumange nibadu ba gowasa ba ba wasulõna ba ba zabato, ba gowuloa ma’uwu Gizeraëli fefu. Ya’ia zame’e sumange fameta horõ ba sumange ni’a ba sumange nitunu ba sumange fangorifi, ba wameta sala ma’uwu Gizeraëli. Famotokhi Taromali Lowalangi Sinanõ ba dõdõ tehalõ moroi ba zura Hezekieli 45 : 9b Famakao ba famalangõgõ, ba mibõhõli, ba milau zadõlõ ba satulõ. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 149 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 283 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***