21 Agustus 2022 (Bahasa Nias)

Minggu, 21 Agustus 2022 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 10 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 217 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunӧ 50 : 14 - 23 14 Be’e sumange Lowalangi wangandrõ saoha gõlõ, ba bu’a khõ Wondrege zalawa andrõ gamabu’ula limõ! 15 Ba angarõfi li ndra’o, na bawa wamakao, ba u’orifi ndra’ugõ, ba õsuno ndra’o dania. 16 Ba ba zebua horõ iwa’õ Lowalangi ”Hadia wa õtunõ gamakhoita andrõ khõgu, ba hadia wa õhalõ ba mbeweu gamabu’ula ligu. 17 Ba tekhõu sa wamondrongo famobawa lala andrõ ba no õ’erogõ daroma ligu. 18 Na õ’ila zanagõ ba omasi ndra’ugõ, ba faofao ndra’ugõ ba zohorõ. 19 Lõ nitahamõ beweu, ba zi lõ sõkhi, ba no ifakhai walimosa lelau. 20 No dumadao ndra’ugõ wamatou talifusõu; ono ninau no õtandrawaisi. 21 Da’õ nilaumõ, ba lõ sihede ndra’o, ba õwai no fagõlõgõlõ ndra’o khõu. Ba u’ohe ba huku ndra’ugõ, u’oroma’õ khõu. 22 Ba mitõngõni da’õ, ya’ami solifu Lowalangi, fa bõi usasawi ami, si lõ sangorifi. 23 Same’e sumange fangandrõ saoha gõlõ, da’õ zamolakhõmi ya’odo, ba ba zi lõ sinegu ba mbuabuania u’oroma’õ wangorifi andrõ khõ Lowalangi.” Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Heberaio 12 : 18 - 29 18 Lõ’õ sa nirugimi hili nibabaya andrõ, siholahola andrõ, ba lõ nirugimi sa’oe, ba sogõmigõmi, ba fe’ugu’ugu mbanua, si fao angi, 19 ba li dorofe, ba li zihede andrõ, me mangandrõ zamondrongo andrõ, bõi sa’ae yamuhede khõra; 20 me tebai lataha ni’oroi’õ andrõ: ”Ba he ahe zaliwaliwa ba danõ zanguhundragõ hili, ba nibunu, nitebu kara;” 21 wa’ata’ura zoroma andrõ, tobali imane Moze: ”Oi so wa’ata’ugu, manizinizi ndra’o!” 22 Ba no mirugi hili Ziona andrõ, ba banua Lowalangi sauri andrõ, Yeruzalema andrõ, si yawa, ba zorugo, awõ ngahõnõ mala’ika, 23 ba owuloa andrõ, banua zi a’a, nisura tõi ba zorugo, ba Lowalangi, sanguhuku fefu, ba niha ira, ba bekhu zatulõ andrõ si no mo’ahonoa, 24 ba sama’ema andrõ, ba wawu’usa li si bohou, Yesu, ba do fanefe andrõ, si sõkhi fehede, moroi ba ndro Habeli. 25 Mifaigi, fa bõi mitimba zihede andrõ. Na tebai sa aefa da’õ, sanimba sanguma’õ li ba guli danõ andre, ba tenga mendrua manõ ita, na ta’erogõ zihede moroi ba zorugo andrõ? 26 Me luo da’õ ifaheu danõ linia, ba iada’e, ba no ifabu’u linia, imane: ”Samuza tõ dania ufaheu, tenga ha tanõ, banua si yawa gõi”. 27 Ba si ”samuza tõ” andrõ, ba ba wamalalini nifaheu andrõ, nifazõkhi andrõ, faekhu, ena’õ si lõ tebulõ zi tebai humede. 28 Andrõ, me no mõi khõda mbanua si tebai humeuheu, ba data’andrõ saoha gõlõ; da’õ zomasi Lowalangi, fe’amõida enoninia, yafao wangerangera ba fa’ata’u; 29 alitõ si mangamanga hadia ia sa Lowalangida andrõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yesaya 58 : 9b - 14 9b Ya’e ndra’odo! Na õbato wangõhõndrõgõ awõu, na lõ’õ sa’ae õtuturu niha, ba na õbato wanandrawaisi awõu. 10 Na õbe’e ba zolofo mbalazou [somasi’õ] ba na õrara dõdõ zebua famakao, ba humaga haga andrõ khõu ba zogõmigõmi, ba hulõ haga ba zi laluo zogõmigõmi andrõ khõu dania. 11 Ba lõ ibato wamasao ya’ugõ Yehowa; i’abusoi’õ ndra’ugõ ba danõ si no okõlikõli, i’abe’e’õ dõlau. Ba tobali hulõ kabu nihaogõ famatorõ idanõ ndra’ugõ, hulõ gumbu, si lõ aetu idanõ. 12 Ba awõu andrõ, ba la’otomosi zui gadudula andrõ, si no arara: dayadaya ba gõtõ fõna õfuli õfa’anõ. Ba labe’e tõimõ ”Zangazõkhi sadudu” ba ”Sangehao lala, ena’õ ta’ila ta’iagõ da’õ.” (F. 61, 4). 13 Na lõ õlau zalakha ba zabato, fa bõi õhalõ halõwõu, na luo ni’amoni’õ andrõ khõgu; na õbe’e tõi zabato ”omasiõ” ba tõi luo ni’amoni’õ andrõ khõ Yehowa ”nifosumange” ba na õfosumange ia, fa bõi õhalõ halõwõu ba fa bõi õlau nilaumõ, awõ deatea mbewe andrõ. — 14 Ba tobali omasiõ khõu Yehowa, ba ufatõrõ ndra’ugõ ba zohili tanõ, ba ube’e õu dána khõ wurugõmõ Yakobo andrõ. Hiza, no taroma li Yehowa! Famotokhi Taromali Lowalangi Sinanõ ba dõdõ tehalõ moroi ba zura Sinunӧ 50 : 23 Same’e sumange fangandrӧ saohagӧlӧ, da’ӧ zamolakhӧmi Ya’odo, ba ba zi lӧ sinegu ba mbuabuania U’oroma’ӧ wangorifi andrӧ khö Lowalangi. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. Liturgos : Manunõ ita moroi ba Mbuku Zinunõ No. 241 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 247 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***