22 Mei 2022 (Bahasa Nias)

Minggu, 22 Mei 2022 FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami, Ya’ahowu!, no maoso Keriso! Jemaat : Ya'ahowu! Duhu No Maoso Keriso! Liturgos : Yafao-fao khõmi Lowalngi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 30 : 1-2 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba na lõ mususugi Keriso, ba si lõ boto wamatimi andrõ, ba lõ si tebulõ ami ba horömi; Ba iada’e, ba no mususugi Keriso, moroi ba ngai zi mate. (I Kor. 15 : 17 ba 20a). HALELUYA! Jemaat : Manunõ Liturgos : Mangandrõ ita, "He Yesu Keriso So’aya ya’aga, Sangorifi ösi gulidanõ andre. Ma’andrõ saohagõlõ khõ-U me no Õlaŵa wa’abõlõ horõ ba fa’amate ba wemaoso-Mö andrö. Iada’e lõ sa’ae ata’u ndra’aga ba lumö wa’abõlõ wa’amate andrõ, me no maoso Ndra’ugõ ba wangorifi ya’aga. No alõmõ wa’amate andrõ ba wemõna, No Õ’efa’õ ndra’aga ba wa’abõlõ zogõmigõmi ba no Õ’ohe ndra’aga ba haga. No Ö’efa’ö ndra’aga moroi ba wesu horõ, irege tobali ndra’aga ono khö Lowalangi Ama. He Yesu Keriso no Öfaogö ndra’aga ba wa’amate-Mö ba tesusugi göi ndra’aga ba wemaoso-Mö andrö, ma’andrö khö-U böi bulö’ö khöma howuhowu-Mö, me Ya’ugö zamatörö banua si yawa awö danö i’otarai da’e irugi ba zi lö aetu, Yaduhu!"Mudadao Zato Liturgos : Manunõ ita moroi ba Mbuku Zinunõ No. 303 : 1 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Yeremia 33 : 1 - 9 1 Ba humede Yehowa khõ Yeremia, samuza tõ, me ba gurunga na so ia, ba naha zago, imane: 2 Da’õ niwa’õ Yehowa, solau, Yehowa sogoi tõdõnia, ba wamalua — Yehowa dõinia —, imane: 3 Angarõfi li ndra’o, ba utema liu, ba u’ombakha’õ khõu zebua, si tebai aboto ba dõdõ niha, si lõ õrai õrongo. 4 Imane sa Yehowa, Lowalangi Ndraono Gizeraëli, ba nomo ba mbanua andre ba ba gõdo razo mado Yuda, nidudugõ, lualua fari andrõ ba lualua zi’õli. 5 So zi mõi fasõndra ba Ndrawa Galedaia ba lafo’õsi [nomo andrõ] boto niha si mate, nibunugu ba wõnugu andrõ ba ba mbakhubakhu dõdõgu; bõrõ walõsõkhira fefu, wa no ubini’õ mbawagu ba mbanua andre. 6 Hiza, ufatõfa khõnia daludalu nifalemba, famadõhõ; ufadõhõ zokhora ba ubõla’õ khõra wangorifi, si fahõna, ba si lõ mamalõmalõ. 7 Ba u’ohe mangawuli ni’oloi’õ andrõ, mado Yuda ba Iraono Gizeraëli, ufuli u’a’azõkhi ira, si mane fõna. 8 Ba uhaogõ ira, uheta golalõwara fefu, lalõra khõgu; ube’e aefa khõra zalara fefu, salara khõgu, me lalawa ndra’odo. 9 Ena’õ turiagu omasiõ ba fanuno ya’odo ba lakhõmigu ia (mbanua andrõ), ba niha ba guli danõ fefu, sogikhi tõdõ dania ba sanizinizi ba zi sõkhi andrõ ba ba wangorifi andrõ fefu — na larongo — nibe’egu khõra. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 114 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U." Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Imane taroma Li Lowalangi: "Ba no erege dödö-Gu õbe’e ba horõu andrõ; no õfakao-Do olalõŵamõ. Ya’o, Ya’odo andre zamunu lalõu andrõ, bõrõ Ndra’o, ba lõ’õ sa’ae itõrõ tõdõ-Gu horõu." (Yesaya 43:24b-25) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 14 : 11 - 14 11 Mifati khõgu, wa ba dõdõ Nama so ndra’o, awõ wa ba dõdõgu so Nama; ba na lõ’õ, ba mi’amati ba halõwõ andrõ. 12 Si ndruhundruhu niwa’õgu khõmi, ihalõ dania halõwõ andrõ, nihalõgu, samati khõgu, ba sebua moroi andrõ ihalõ, me khõ Nama mõi ndra’o, 13 ba hadia ni’andrõmi, ba dõigu, ba u’o’õ, ena’õ tefolakhõmi Nama ba khõ Nono. 14 Na so ni’andrõmi khõgu ba dõigu, ba u’o’õ. Ya'ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yakobo 5 : 13 - 18 13 Na so ba khõmi zi gõna famakao, ba yamangandrõ, na so zohahau tõdõ, ba yamanunõ. 14 Na so zofõkhõ ba khõmi, ba yamufahede’õ ba zatua mbanua, ba ndramangandrõ ba khõnia, ba ndramubayoini ia fanikha, ba dõi Zo’aya; 15 ba i’orifi dania zofõkhõ andrõ fangandrõ andrõ, soroi ba wamati, ba i’abe’e’õ So’aya, ba na so horõ, nifazõkhinia, ba te’efa’õ khõnia. 16 Ba faoma mi’ombakha’õ khõ nawõmi horõmi, ba faoma mi’angandrõ, salahi nawõmi, ena’õ tefadõhõ wõkhõmi; abõlõ sibai wangandrõ niha satulõ, na moroi ba dõdõ. 17 Eliya andrõ, ba no niha, si mane amuatada gamuatania, ba mangandrõ ia, moroi si’aikõ ba dõdõ, fa bõi moteu, ba lõ teu ba danõ, medõlu fakhe a matonga. 18 Ba ifuli mangandrõ, ba so deu, moroi yawa ba mbanua, ba mowua danõ. Famotokhi Taromali Lowalangi Sinanõ ba dõdõ tehalõ moroi ba zura Yohane 14 : 13 Ba hadia ni’andrömi ba döi-Gu, ba u’o’ö, ena’ö tefolakhami Nama ba khö Nono. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 156:1 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Mudadao Zato. Liturgos : Manunö ita moroi ba Mbuku Zinunö No: 244 : 1 - 2 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 253 Pengkhotbah : Ya'ahowu!!! Jemaat : Ya'ahowu!!! ****** IBADAH SELESAI ******