[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI
Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu!
Jemaat : Ya'ahowu!
Liturgos : Yafao-fao khõmi Lowalangi!
Jemaat : Ya fao khõu Geheha-Nia!
FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No.
190
FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA!
Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato
Liturgos : Manunõ ita moroi ba Mbuku Zinunõ No.
230
FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura
Hosea 5 : 15 - 6 : 6
15 ufulido ba nahiagu. Ba fozu dania, ba aboto ba dõdõra ba la’alui wamaigigu ya’ira; na tosasa ira, ba humulu dõdõra khõgu.
1 Talabu, tafuli ita khõ Yehowa; ifuli sa ifadõhõ zokhoda, me no amaedola isasawi ita, idaludaluni zokhoda andrõ, me no ifesokho ita!
2 Ha mato dua wongi, ba i’orifi ita, ba mahemolu õ, ba ifuli i’abe’e’õ ita, ena’õ auri ita rorogõfõnia.
3 Akha aboto ba dõdõda, ba ena’õ na taforege wangalui fa’aboto ba dõdõda Yehowa, — mõi ia khõda, si ndruhundruhu timba wa’aduhu wa’amoluo, ena’õ itõrõ ita, timba deu, timba deu sara, si basõi tanõ.”
4 He uwisa khõmi ya’ami mado Geferayi? Hadia nilaugu khõmi, ya’ami mado Yuda? Me no hulõ lawuo ba zanguhulõ wongi wa’omasimi andrõ, me no hulõ namo mbanua, salio sibai taya.
5 Ba me no si manõ, ba lõ tola lõ ufabago’õ ira ba zama’ele’õ andrõ, ba lõ tola lõ ububunu ira taroma ligu andrõ, ba nifa’ele’õ wanguhukugu, si mane fa’atumbu luo.
6 Fa’omasi sa zomasido, ba tenga sumange nitaba; fa’aboto ba dõdõra Lowalangi zomasido ba tenga sumange nitunu!
Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1
FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!"
Jemaat : Manunõ moroi ba Mbuku Zinunõ No. 224 : 1
Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura
Galatia 3 : 1 - 14
1 I. He ya’ami, banua Galatia, si lõ tõdõtõdõ! Ha niha zolau elemunia khõmi, khõmi, si no mube’e famaedo Yesu Keriso, ba duduma hõrõ, famaedo Yesu Keriso niforõfa?
2 Ha da’õ nisofugu khõmi: Hadia, moroi ba wolo’õ oroisa, wa no mitema mege Geheha, ba ma moroi ba duria wamati andrõ?
3 Hadia, si manõ wa’ambõ tõ lõ andrõ khõmi? Ba Geheha mibõrõtaigõ no, ba hadia, ba nõsi niha wozu khõmi dania?
4 Hadia, ha wa’oya’oya zi no itõrõ ami, hadia, zayazaya gõlõ? Si ndruhu zayazaya gõlõ tawa’õ?
5 Ba sama’ema khõmi Eheha andrõ, sanga’asogõ khõmi fa’abõlõ, hadia, moroi ba wolo’õ oroisa, wa ilau da’õ, ba ma moroi ba duria wamati andrõ?
6 Si mane Aberahamo, ”mamati ia khõ Lowalangi, ba tebe’e fa’atulõ dõdõnia”.
7 Ba aboto sa’ae ba dõdõmi: ha niha zi otarai wamati, da’õ ma’uwu Gaberahamo.
8 Ba me no tohõna oroma ba zura, wa moroi ba wamati andrõ atulõ niha baero, iwa’õ Lowalangi, andrõ tehõnagõ te’ombakha’õ khõ Gaberahamo duria somuso dõdõ, imane Lowalangi: ”Moroi ba khõu tefahowu’õ dania fefu soi ba guli danõ”
9 Tobali awõ Gaberahamo, samati andrõ, tefahowu’õ zi otarai wamati andrõ.
10 Ha wa’ato sa zi otarai wolo’õ oroisa, ba no tohare khõra wangelifi. Noa sa so ba zura: Ni’elifi dozi si lõ manõrõ fefu, hadia ia, zi so ba zura goroisa andrõ, ba wolo’õ ya’ia.
11 Ba no oroma, wa samõsa lõ satulõ iwa’õ Lowalangi, ba goroisa andrõ, imane: ”Moroi ba wamati auri dania zatulõ andrõ.”
12 Ba tenga moroi ba wamati goroisa andrõ, imane: ”Ha niha zi no molo’õ, da’õ zauri ba da’õ.”
13 No ihõli ita Keriso, ba wangelifi andrõ, ba goroisa andrõ, me no tobali ni’elifi ia, salahida, me no so ba zura: ”Ni’elifi dozi nitawi ba dõla geu,”
14 ena’õ falukha niha baero howuhowu andrõ khõ Gaberahamo, ba khõ Keriso Yesu, ena’õ tatema gamabu’ula li andrõ, Eheha andrõ, moroi ba wamati.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura
Mataio 9 : 18-26
18 Me iwa’õ khõra da’õ, ba hiza zalawa, si mõi yomo, mangalulu khõnia, imane: No mate mege nonogu alawe, ba ae tufa ia tangau, ba auri ia.
19 Ba maoso Yesu, i’o’õ, awõ nifahaõnia.
20 Ba hiza ndra alawe, sendro talu, no mewelendrua fakhe sa’ae; i’ondrasi Yesu moroi furi, ibabaya gahe mbarunia;
21 imane sa dõdõnia: He ha barunia ubabaya, ba dõhõ wõkhõgu.
22 Ba ibali’õ ia Yesu, i’ila ba imane: Bõi ata’ufi, onogu; no i’orifi ndra’ugõ famatimõ andrõ. Ba abe’e ndra alawe andrõ, i’otarai da’õ sibai.
23 Ba me irugi nomo zalawa no mege Yesu, me i’ila zolau sigu, awõ niha sato, si faguagua, ba imane:
24 Miheta ami, tenga sa si mate nono alawe andrõ, si mõrõ. Ba la’igi’igi’õ ia.
25 Ba me no tefofanõ baero niha sato, ba mõi ia si bakha, ira’u danga, ba maoso nono alawe andrõ.
26 Ba humõngõ duria da’õ ba danõ andr?, ma’asagõrõ.
- Famotokhi Taromali Lowalangi
- Sinanõ ba dõdõ tehalõ moroi ba zura
Mataio 9 : 22a
Ba ibali’ӧ Ia Yesu, i’ila ba Imane: Bӧi mi’ata’ufi, ono-Gu; no i’orifi ndra’ugӧ famatimӧ.
- Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunõ ita moroi ba Mbuku Zinunõ No.
200
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba
Mbuku Zinunõ No.
256
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
Tidak ada komentar:
Posting Komentar